नेपाली भाषामा शब्दहरू कहाँबाट आए?

शुद्ध नेपाली लेख्न सिक्नका लागि सर्वप्रथम हामीले नेपाली भाषाका शब्दहरू कहाँबाट आएका हुन् भनेर बुझ्न जरुरी छ, किनभने शब्द कहाँबाट आयो भन्ने आधारमा नै त्यसलाई कसरी लेख्ने भन्ने नियमहरू निर्धारण हुन्छन्।

विश्वमा बोलिने सबै प्रमुख भाषाहरूमा झैँ नेपाली भाषामा पनि शब्दहरू विभिन्न स्रोतहरूबाट आएका छन्। नेपाली भाषाको सबैभन्दा ठूलो स्रोत चाहिँ संस्कृत भाषा हो किनभने यो नेपाली भाषाको माउ भाषा (जननी) हो।

तर संस्कृतबाहेक पनि नेपाली भाषाले मैथिली, गुरुङ, मगर, तामाङ, नेपाल भाषा (नेवारी) जस्ता नेपालमै बोलिने अन्य भाषाहरूदेखि लिएर अङ्ग्रेजी, अरबी, फारसी, उर्दू, पुर्तगाली भाषासम्मबाट शब्दहरू सापटी लिएको छ।

संस्कृतबाट नेपाली भाषामा आउँदा केही शब्दहरू जस्ताको तस्तै आएका छन् भने केही चाहिँ थोरै रूप फेरिएर आएका छन्। त्यसैगरी केही शब्दहरू चाहिँ नेपाली माटोमै उत्पत्ति भएका छन्। तिनलाई क्रमशः तत्सम शब्द, तद्भव शब्द र देशज (झर्रा) शब्द भनिन्छ। अन्य भाषाहरूबाट आएका शब्दहरूलाई भने स्वदेशी आगन्तुक शब्द र विदेशी आगन्तुक शब्दमा विभाजन गर्ने गरिन्छ।